英超最後一輪，伯明翰、黑池英冠再見！

鬥到最後一輪，唔係英超冠軍誰屬，而係邊隊陪韋斯咸去英冠玩！如果有睇直播既朋友，上半場同下半場，簡直就係天堂與地獄，未到最後真係咩都可以發生！

布力般如果唔係印度老闆怒炒大傻，由阿蘭拿斯領軍既“暴力般”我估唔使搞到護級掛？好衰唔衰就係搞到咁，仲要去到呢場對狼隊，整番場護級大戰。上半場布力般射到3：0，大家都開始覺得狼隊無救，因為另一邊曼聯被黑池迫和，伯明翰又和，韋根又和，得失球差又無左優勢……點知下半場自己追下一球追下一球，亨打入球靚波2：3，全場興奮喇！點解？黑池重傷麻，輸夠2：4，另一邊伯明翰追一度落後0：1，力追到1：1，得失球比狼隊差，最後仲比柏夫尤真高射多腳靚波輸埋、摺埋……所以韋根扑濕史篤城，都顯得無關痛癢，布力般同狼隊留低，伯明翰同黑池就英冠再見……

其實伯明翰要搞到降班，同佢地既風格太懲同攻擊力弱有直接關係。37球，一季就只有37個入球，單係主場就已經俾人入左36球；主場贏8場、作客只贏2場既成績，又點可能唔降班？數字未必可以說明一切，但係數字講俾我地聽，伯明翰抵死！

至於黑池，單係講兩循環入到曼聯每場各2球，就已經唔係咁多隊可以；不過一場輸2：3、一場2：4，又可以引證到黑池有前無後打死罷就既心態。同之前既侯城一樣，上半季大打進攻、搶攻足球，係榜前列一大輪，之後亂棍一招無人不曉，隊波就原形畢露，係咁輸……其實韋根一季只係贏得9場波，黑池就主場作客各有5場勝仗，但係韋根和左15場波，而黑池只有9場，黑池入55球失78球，韋根入49球失61球，明顯韋根知英超點踢，唔好太主攻，有分就袋喇！黑池自殺式既踢法，今年唔降下年都要降，今年都仲有一句「雖敗猶榮」！

伯明翰攻力太弱，英超唔啱你……

黑池有前無後、打死罷就，終於出事！

鎚仔幫降班！

雷神奇俠都幾好睇，因為有唔少打鬥場面，其中雷神托爾既"雷神之鎚"非常厲害，托爾無左就費人、有佢就醒神！不過英超既大鐵鎚就無咁勁，仲成為今屆英超聯第一隊降班球隊，今期既主角鎚仔幫韋斯咸(West Ham united)。

其實今屆韋斯咸都幾怪，好似佢地長期第尾，不過就出左個英格蘭足球先生柏加(Scott Parker)；佢地隊波無出名球星咩？一定唔係柏加、羅比堅尼(Robbie Keane)、布歷治(Wayne Bridge)、格蓮(Robert Green)、卡頓高爾(Carlton Cole)、丹巴巴亞(Demba Ba)，不過佢地既入43球同失67球得失球-24，全英超最差！其實睇佢地既波都知，佢地入球率係主場同作客都唔差，可惜前面入埋都唔夠後面輸，作客失球高達38球，成日都大手交易，明顯出事既地方係後防。1月之後入左一對前鋒，其中丹巴巴亞作用明顯，10場比賽入7球，效率咪話唔高！同時間入左中堅達哥斯達(Manuel Da Costa)、借用布歷治。達哥斯達助攻一流、防守九流；布歷治無速度、又無傳中能力，係曼城費左武功，加上厄遜(Matthew Upson)受傷之後中堅明顯無人補到佢個位，成日甩漏、有球必應……

另外一個問題，在於領導層既問題。高特(David Gold)同蘇利雲(David Sullivan)呢對組合，將手上既伯明翰(Birmingham City)出手之後，再次投入足球市場，入股收購韋斯咸。不過幾年前既冰島富豪馬古臣入主球會，大灑金錢買左一大批人，跟住自己破產連累球會，可以話原氣大傷。高特入主球會，同佢以前入主伯明翰一樣，都係小買小賣、借得充借，咁搞法球會既組軍就係由失意軍人加球會青訓舊人組合而成，戰鬥力成疑。

                                                 羅比堅尼傷不逢時……

上季季尾由前車路士領隊格蘭(Avram Grant)代替蘇拿(Gianfranco Zola)出任領隊，而家睇番又係一錯。格蘭好有佢既理論，不過就唔多見到佢帶波既風格，特別係佢地輸緊波既時候，佢真係亂排四前鋒去打！當然傷兵都幾困擾住佢，不過明顯連續兩屆帶隊降班，佢都幾黑仔。

鎚仔幫降班，係幾令人失望，不過佢地都唔係第一次降班，上一次升返上黎，都係幾年前既事，寄望佢地下年英冠努力喇！

                                          柏加攞足球先生獎，都阻唔到球會降班……

界外球‧世界盃來了！

界外球‧世界盃來了！
對於上屆2006年世界盃大家又有什麼回憶？決賽的施丹頭捶？巴西神奇四俠大跌watt？定係義大利四奪世界盃？想一想，時間就是不肯停下來，四年時間就這麼快過去，06年一起看決賽的人，這一回還會跟你一起看嗎？

尋晚凌晨國際足協就舉行了2010年世界盃的分組抽籤儀式，並確定了各小組的名單。其實到真正比賽時間，尚餘半年時間左右，現代足球比賽太多，做成球員傷病十分嚴重，未到正賽時間都不知道誰能上陣與否，所以各隊實力還有很多變數存在。

今屆抽籤儀可以說是巨星雲集，獲邀嘉賓超過二千人，當中包括南非前總統曼德拉、國際足協會長白禮達、歐洲足協會長柏天尼、德國名宿碧根鮑華、尤西比奧、米拿，當然唔少得為英格蘭爭辨2018年世界盃的碧咸，他更是現役球員中擔任嘉賓的唯一歐洲代表！三十二支決賽周球隊領隊或代表等當然不可少！好了，看一看各組形勢！

A組：南非、墨西哥、烏拉圭、法國
B組：阿根廷、韓國、尼日利亞、希臘
C組：英格蘭、美國、阿爾及利亞、斯洛文尼亞
D組：德國、澳洲、迦納、塞爾維亞
E組：荷蘭、日本、喀麥隆、丹麥
F組：意大利、新西蘭、巴拉圭、斯洛伐克
G組：巴西、朝鮮、科特迪瓦、葡萄牙
H組：西班牙、洪都拉斯、智利、瑞士

A組﹕老實說，法國雖然以不名譽的"手"法，在附加賽淘汰愛爾蘭晉級，不過爛船也有三分釘，前中後場不論經驗或實力都是上乘的星級人馬，所以首選是法國。而墨西哥跟烏拉圭都是有實力的球隊，我想都能對法國造成不大不少的壓力。東道主南非…我想他們會是近年表現最差的主辦國。最後期望亨利可以再一次用實力為自己正名！

B組﹕這一組阿根廷可以說，是實力最強的一隊，牌面粒粒皆星，不過最弱的一環，非教練球王馬勒當拿莫屬！老馬帶波成績如何？有眼見！更因為"爆粗"，連進入抽籤儀式也不可以！有星級陣容，卻打出一般成績，唉……韓國在02神蹟之後，實力仍是亞洲一班、世界二流，不過肯打肯搏之餘，靜悄悄的輸出不少球員留洋學法，仍是16強出線黑馬。尼日利亞正處交接時期，能否有一番作為仍屬未知之素；相反有點青黃不接的希臘，仍然只有寄望教練列哈格。

C組﹕英格蘭可說抽中上籤，皆因對手看似強橫，實則實力見底的疑似黑馬。美國在洲際國家盃的表現不俗，老中青球員的交接慢慢進行中，跟大聯盟的慢慢成熟不無關係，是此組次名的個人之選。能淘汰有"沙皇"艾沙雲壓陣的俄羅斯，斯洛文尼亞靠的鐵一般防守，在決賽週是不是仍然有效呢？阿爾及利亞擊潰埃及的說服力不足，在傳說最強一屆的非洲球隊群中，可能要敬陪末席。

D組﹕此組跟C組十分相似，德國鶴立雞群，如無大面積傷患，是實力超班的球隊。迦納有強橫的中場線作支持，經過06一屆的洗禮，今屆可能有驚人的表現！塞爾維亞在外圍賽打得很出色，不過他們在決賽洲上常有走樣的表現，值得留意。澳洲沒有希丁克，如希臘沒有列哈格，如果沒有脫大入亞，能否出線是一個疑問。

E組﹕不用說荷蘭跟喀麥隆攜手出線最正路，始終日本實力因球員大面積的外流，而有明顯的進步，可惜實力上有很大的差距。而丹麥的出線決賽週，一直都是我的疑問，葡萄牙跟瑞典真的墮落至如此地步？還是做不了施丹就只有做馬基利尼，一味靠力？丹麥…我只看到足球的"力量"……

F組﹕意大利如何不濟，我看也不會輸給紐西蘭吧？不過巴拉圭跟斯洛伐克均非善男信女，意大利可以說是可勝不穩。斯洛伐克在跟捷克一道尚未獨立之時，經常"外輸"球星予捷克，如今自己打正旗號打世界盃，我看還是務實的學習心態為佳。巴拉圭可能是讓人驚喜的一隊，值得大家留意。

G組﹕巴西可以說是實力最強的一隊；葡萄牙緊隨其後，外圍賽上面對力量型的北歐兄弟，暴露了他們對抗性不足的弱點，可是技術流的葡萄牙，在決賽週上會有作為。科特迪瓦牌面嚇人，不過杜奧巴老了，高路托尼慢了，個人認為他們號稱非洲最強，卻有很大機會成為令人最失望的球隊之一。朝鮮好像很神秘，其實出線也只是一道板苦，守！他們靠體力悶和對手，打出一個0:0的和局，這一招在世界盃上，我看是行不通的。有人說這一組是死亡之組…我看，未必，倒是朝鮮悶死葡萄牙，有一點看頭！

H組﹕這一組西班牙如果不能出線，比02年法國折翼同樣震撼！不過洪都拉斯實力平平，很難想像他們有當年塞內加爾手刃宗主的力量。而智利跟瑞士實力不相伯仲，當然智利看高一線之下，次名出線之位反過來是焦點所在。

好，一口氣分析了六組形勢，很想用winning eleven 2010來預演一下，誰知道我的Xbox360死了機……

碧咸有型之餘，敬業精神值得學習！

南非土產奧斯卡影后查理絲花朗(Charlize Theron)，仍然咁靚！

前喀麥隆球星米拿，他教曉我們老將的價值！

不知道黑豹‧尤西比奧C有沒有教朗如何打朝鮮呢？幾十年後仍然是朝鮮vs葡萄牙！

近期因為法國跟愛爾蘭的麻煩而苦惱的國際足協白禮達

英超新球衣出場！

季尾轉會新聞日日都講，皇馬做晒主角，太多人講…好我唔講，不如講下英超新波衫！英超有一條特例，歐洲各地聯賽、甚至蘇超都無既---就係各英超球會既主場波衫一定要著兩季，作客球衣例外。當中亦都有特例既，好似05-06年阿仙奴有一季著深紅色波衫果一季，佢地就無跟呢條例，無他既最後一季高貝利作賽既紀念版播！而波衫既法都係唔想球迷們買衫買到窮。講左咁多第一件要介紹既，就係……

1.利物浦


睇睇下，好似又真係無咩特別…只係改左白色V領既設計……



相反呢件作客，用番綠色都幾好，灰色年代既利物浦可以收工喇…雖然我覺得上季作客好靚，仲係奧脫福打個4:1返歸……(圖太細，大家上官網睇…)

2.車路士

一個字型！我唔係車仔迷，但係咁新科技既設計，真係要諗諗佢！波衫一直都係大路既POLO領、V領或者圓領設計，好多年前紐卡素出企領可以話有少少破格，點知今年車仔出左個偽拉鍊領，即係唔係真係拉鍊，但係勁似係既設計；加上胸前既暗花，真係幾正！

波歷克真係幾型，比人笑品味差…咁齋著波衫囉……


作客同樣破格…不過同主場差唔多色…作死唔通又出第二作客、歐聯作客？


介紹咁多先！不過加插一件英冠波衫……紐記作客，唔知大家又會覺得點呢？


轉會新聞﹕
1. 維拉傳收購德甲拜仁中場保路斯基---現年29歲既德國中場，上季轉投拜仁可以話失敗收場，英超維拉出價500萬磅，唔知成唔成交呢？用佢黎代替離隊加入油王兵團既巴利…要睇睇先知…


2. 兵工廠出錢截擊紅魔收購賓斯馬---效力法甲里昂既法國國家隊前鋒賓斯馬講過，唔係好想踢英超，而且今年唔想離隊，唔知係唔係吊高黎賣，費sir講明要入手呢件高大前鋒，作價2500萬砟咁話，哈哈…一路俾人笑出手孤寒既阿仙奴竟然話要搶到手……都係果句，要睇睇先知…

巴塞眾望所歸‧曼聯輸在太囂

對好多球迷黎講，球季已經隨住星期三既歐聯決賽而結束喇。點解？因為各大聯賽收工既收工，未收工既，都係得番一兩場波未打打，冠軍、降班都呼之欲出，歐聯都打埋，大家可以提早抖暑喇！不過講番歐聯先，決賽既戲碼係由英超冠軍、上屆歐聯得主曼聯，對西甲雙料盟主(西甲、國王盃)巴塞隆拿，喺意大利既羅馬奧林匹克球場一決高下。今年無120分鐘既水戰死鬥，亦都無搏甩脾、打爆門牙帶血流吞既激情，有既只係同歐洲國家盃一樣，由西班牙…唔係係由加泰隆尼亞式"4號"中場主宰賽事，2:0既賽果都唔能夠描繪出巴塞控制成場比賽既實況。曼聯係中場盡失、進攻無力之下，兩次技術性既"失誤"，未能成為自92年改制已黎第一枝蟬聯冠軍既球隊，但係巴塞就成為第一枝西班牙既三冠王！

講左咁多，成場波可以用驕兵必敗黎形容呢場波。星期二既羅馬機場，C朗、維迪等等既曼聯球員，一落機就西裝畢挺意氣風發，好似過黎係捧梗盃志在必得咁。無他既，巴塞隆拿係四強戰，對住曼聯既手下敗將車路士，踢到鬼死咁辛苦，唔係恩尼斯達既世界波，分分鐘已經出左局。上場波前鋒美斯、中場大腦沙維都踢得唔好，最慘就係左閘艾比度領紅、右閘丹尼爾艾拉維斯領黃夠分，決賽一定要停賽，費爵爺一睇到咁既消息，可能笑甩下爬…巴塞後防一路都好唔穩定，就係丹尼爾叫做俾到人信心，而左閘一路都無一個好既後備，無左艾比度得番巴西老將斯雲奴，仲有個神經龍門域陀華迪斯，後防真係危危乎。當然C朗近期好fit，對波圖既遠射、對阿仙奴既罰球，同埋喺英超既表現，都俾到大家信心，呢次決賽會比上一年打得好。上年曼聯四強既時候，對手正正就係巴塞，當時佢地都令對手打唔出水準，間接令荷蘭藉教練列卡特下台。歷史上三次係羅馬打既決賽三次都係英格蘭既球隊勝出，睇牌面曼聯真係高過巴塞好多。唯一隱憂係中場費查因為停賽出唔到。

呢次對巴塞黎講真係一次挑戰，除左有主力停賽之外，教練既經驗同戰術既設定黎講，佢地都係處下風。費格遜縱橫球壇三十幾年，教曼聯呢廿幾年，要贏既佢都已經贏過晒，三冠王佢99年已經帶隊做到喇！相反哥迪奧拿無帶隊既經驗，今年戰績真係唔錯既，不過同費爵爺一比，真係差好遠好遠。上場對車路士，哥迪奧拿唔係無危險架，補時世界波之前，巴塞真係無晒車仔辨法。車仔既領隊都係老帥，荷蘭既金牌教練希丁克是也，兩隊一打就試出對方係老手，第一回合唔同你玩守未訣，第二回合肉搏戰之下，大場艾辛一腳遠射收死巴塞，成場壓迫巴塞，嘩！唔好睇但係好實用播！無奈真係陰謀論又好、球證堅持己見好，幾球十二碼可判無判，車仔出局可以話欠運。

好，真正既比賽又點呢？哥迪奧拿知道自己既三前鋒打法比人睇通，佢稍稍作出調動，將伊度奧同美斯cross over交換黎打，咁右路改打右閘既佩奧爾就唔使陪美斯跑，而對家左閘艾拉就要對又大隻又快既伊度奧。左邊亨利就一路靠邊拉扯奧沙同朴智星，製造空間比斯雲奴，將球場闊度拉開，減低左邊既壓力。防中就改用新人巴斯基斯，將原本人選耶耶托尼退一格打中堅，保持中場一定截擊同後防既防空能力，並善用托尼轉身快夠硬淨既特色。曼聯方面費爵爺可能相信C朗fit，而且對家主力停賽，想趁佢病攞佢命，打番無中鋒陣式，朗尼同C朗遊走左加兩邊，朴智星就係後少少支援既後上前鋒，中場留低老將傑斯，搭上攻防俱佳既卡域克同安達臣，後防無大變動之下，同巴塞對攻！

講完排陣，真係打既時候曼聯可以用出事黎形容！頭十分鐘曼聯可以話真係攻得唔錯，其中C朗就有一次離門三十幾碼既距離試過下水，華迪斯論論盡盡甩手，朴智星差半步近門射高；又一次扣過碧基黎一次遠射射斜，巴塞fans幾驚呀，咁早失波唔通又好似對車仔咁？不過轉捩點黎喇……比曼聯壓到抖唔到氣既巴塞，由中場恩尼斯達欄截得手，一路帶波帶到大禁區頂，沿途安達臣、艾拉、卡域克都好似陪跑咁，一心等佢傳波又或者等佢入禁區既時候夾佢，點知恩尼斯達早知你班人既心態，就係帶到禁區邊艾拉趕過黎聯防巴時間，斜傳俾伊度奧落底，維迪趕到一心閘住佢無死喇，哈哈…伊度奧真係大賽球員，你估佢唔到之下，黎個世紀之cup，一個假身就cup過維迪，再黎一下怪腳一撥，雲達沙都捉到路，但係快成咁怪成咁，都係阻唔到巴塞第一腳射門第一腳就入波1:0！

伊度奧入波後興奮到喊……


之後戰情一面倒，費爵爺可能以為係朴智星、安達臣唔掂，下半場分別換入泰維斯同貝碧托夫，甚至有行家講傑斯唔ok，爵爺換埋史高斯，但係巴塞輕鬆控制中場之下，最後都係再入多粒。中場曼聯球員誤會，俾佩奧爾搶到，交俾沙維無人看管之下，傳左個靚波啱啱笠死李奧費迪南，美斯又叻仔乖巧地頭槌笠埋雲達沙。2:0既戰果，都無得投訴喇！

優勝劣敗，係好正路既事，但係曼聯有少少係敗係自己手下。第一排陣上面錯估對手既後防，因為主力停賽既陣腳大亂，點知人地踢出穩定既水準，連斯雲奴咁耐無踢，都交足功課。相反中場方面將不擅欄截既傑斯排係安達臣同卡域克身邊，就好莫名其妙。如果將朴智星放中場，可能效果會好d，只係費爵爺唔想C朗係左邊要讓位俾傑斯，就硬放傑斯打中場……如果咁唔放泰維斯打正選仲怪！留力？有離心而疑人不用？另外費查停賽，中場無人肯掃垃圾，間接令中場唔夠人撞之下，進攻只能單調咁放長波，走既人又只係得朗尼，朗尼呢場波都幾無奈，C朗唔交波俾佢，佢又過唔到中場，成場波除左協防同墮後攞波之外，真係無咩貢獻。你放長波就正中哥迪奧拿既計劃，明顯佢唔用佩奧爾夾碧基，係因為佢要保持後防線既防空能力，係中場方面佔優，曼聯就只係剩番高波一路！曼聯後防又被人睇到佢地既漏洞，就係艾拉好助攻，而且同身材差唔多既對手有對抗性優勢，換一換伊度奧就出事。而維迪轉身慢、李奧太用腦同錫身，都直接令巴塞入波。第二球中堅唔緊釘對手，李奧難辭其咎。其實車路士用壓縮中場呢招咁成功，點解曼聯唔用呢？相反俾到對手喺中場自由活動，巴塞又難會有胡唔食呢！C朗係fit，但係佢一向都唔係大賽球員，一到關鍵時候佢就會變得好獨食，根本上對整體發揮有好大既阻礙，分分鐘用貝碧托夫、泰維斯都好過用佢。所以成也C朗敗也C朗！

點都好，今季歐聯既得主巴塞，可以用技術性擊倒對手，而成為三冠王之後，哥迪奧拿既巴塞隆拿，會唔會建立起牢不可破既新巴塞重朝？夢二之後呢隊夢三，下年又會點呢？真係令人好期待。而曼聯輸波之後，費爵爺當然好唔滿意，隨即拉住班波係咁鬧喇！點知俾記者影到，費爵爺手指指，C朗竟然怒目相向！仲要唔係一下，係幾分鐘……泰維斯好想留隊，但係曼聯表現唔太積極，佢離隊又好似已成定局……史高斯、傑斯已經老態龍鐘，而安達臣、保斯邦又好似唔夠班，中場得番卡域克、費查同成日傷既夏格維斯，曼聯夏天會唔會再搵人呢？下季再算喇……

C朗發費爵爺脾氣…又想走？！

AC主場不敵羅馬‧紐記下年英冠再見！

由於呢個星期實在太忙，所以遲至今日先出呢篇新既文章。隨住兩個星期前曼聯、巴塞同國米最終登基成功，上星期三又有蕯克達攞走歐協盃，岩岩過左既星期六禾夫斯堡又第一次做一哥，捧起左德甲既"大餅"聯賽錦標，最後只係剩番歐聯同埋英國足總盃未知花落誰家。

一年容易又暑假，不過就正所謂有人歡喜就有人愁，睇下意甲方面AC米蘭又細哨又碧咸，湊到成枝銀河艦隊二代咁，最後一場竟然主場輸左俾羅馬，陰公…仲係馬甸尼最後一場主場既意甲比賽，睇住佢一臉茫然咁既款，唉…90年世界盃既俊俏左閘，都真係時候退休喇。

講番比賽先，如果齋睇數字，兩隊又踢得差唔多啫，AC射門19中8，羅馬就18中7，控球指數仲係AC有55%對羅馬得45%，兩方面都係AC佔優。但係射門比人多都要中龍至得，羅馬左後衛懷斯係36分鐘，接應大衛比沙路橫傳既罰球，左腳怒射破網上半場領袖1:0。羅馬係下半場中段仲帶住AC黎踢，AC真係踢得好曳，前鋒柏圖同恩沙基唔合拍，卡卡又迫到成日係後場走黎走去得個桔！碧咸既助攻助守算交到功課，不過就無直接威脅囉！

場波關鍵時候到。半場先換施多夫，60分鐘再換細哨。碧咸換施多夫有商確既地方，因為佢太鍾意帶波影響節奏；而細哨朗拿甸奴換走柏圖，我就十分認同，雖然放三個要帶波既中場會令中間塞車，但係單前鋒始終都係AC既殺著。果然戰局就由羅馬傾番AC果邊，最後75分鐘由中場大佬岩布仙尼亂軍中射入1:1平手！

AC fans好開心，諗住踢得番十成功力羅馬焦梗。哈，下半場羅馬做既呢一個調動，可以話係全場轉捩點﹕換入年僅22歲既法藉前鋒文尼斯，好快就見效！78分鐘就有一次利用佢既速度，搞到馬甸尼同另一個中堅費華利出晒醜幾乎入波。好喇，踢左成場一對加埋有八九十歲既老人中堅組合出事喇！80分鐘又係簡單既反擊，後場卡卡同施多夫甩左波，懷斯同大衛比沙路兩腳就傳到AC既大禁區，文尼斯一搓就過，老人家追都追唔到，就係咁射成2:1！羅馬可能開心過頭，轉頭就俾AC把握佢地後防既甩漏，又係岩布仙尼帶點幸運咁射入佢既第二球，81分鐘又再一次追成平手2:2！主場球迷就以為好喇，收工喇雖然唔係幾滿意，點知……成場無表現既羅馬王子托迪，無論中場定前鋒都踢得好沉。不過星就係星，85分鐘一次罰球既機會，托迪主射一射死角入網3:2！

下半場真係幾好睇，多波入之餘真係睇到兩隊波都想贏，只係兩隊都係心有餘而力不足，係時候大換血喇！特別係AC一對中堅真係睇到都牙煙，轉身慢、無速度齋靠經驗，真係好大問題。而羅馬就明顯係中場欠左重心，而教練史巴利提帶到隊波又有少少意興闌珊，羅馬又要黎一次重整先至得喇。AC米蘭暫時以得失球壓住祖雲達斯排第二，下場對費倫天拿如果贏波就可以壓住祖記，不過AC輸波呢，就要睇得失球同祖記果邊既賽果，有咩差遲分分鐘要暑假加班，踢歐聯附加賽。估唔到最後一日既比賽，AC米蘭都唔可以輕輕鬆鬆。

另一邊箱英超方面，係最後兩場波一分都攞唔到底下，東北大球會紐卡素終於終結佢地14年既英超既角逐，下年英冠再見。作客維拉呢場波，紐記踢得十分積極，無奈前鋒馬田斯同隊波格格不入，維度卡老態龍鍾成日都甩拖，中場路蘭、古費路、杜夫都帶唔起隊波，始終中場創造力有限之下，埋門少之又少。而維拉有心無意之下，都踢得好一般射門14次先得中2次中龍門，紐記射10都中喇！不過就係其中一次得就得喇…38分鐘巴利一次無意識既射門，竟然省中杜夫成為烏龍球…

老實講紐卡素既沉淪，可以用專文另寫，呢度都唔多講，不過而家薪金全英超排第五既紐卡素，一落英冠就唔見5千萬磅既轉播費收入，下季開季前一定係賣球員既消息多過百佳既廣告。如果舒利亞肯留隊繼續玩，咁出走既人可能會少好多，不過佢既執教能力，我就有唔少既懷疑喇。點都好喇，紐卡素…一路好走，英冠再見。

新聞﹕
馬田祖爾落實加盟阿積士，呢名53歲既荷蘭教頭，今季帶領漢堡係歐協同德國盃，先後兩次對戰雲達不來梅，哈哈…兩次都四強出局。本來同漢堡仲有合約既佢，已經同阿積士新簽三年既合同喇。上手雲巴士頓就未知有無著落喇…AC米蘭又盛傳會由李安納度入主…好亂呀！

季尾各大聯賽小評(二)

經過星期三週中夜波之後，英超聯既王位爭奪戰，應該步入尾聲，隨住曼聯作客反勝維根2:1之後，只要再攞多1分，就可以連續兩年登上英超既寶座之上。而德甲方面史特加果然追緊上黎，作客反勝史浩克04，以61分排第4只落後榜首拜仁慕尼黑同第二位既禾夫斯堡2分，睇黎仍然要鬥到最後。另外蘇超格流又肚痾，作客只能迫和喜伯年1:1，再一次浪費2分既優勢，得失球差唔及些路迪排第二，唔怪得領隊禾特史密夫都唔敢講攞冠軍機會有幾大喇！好又再黎季尾各大聯賽小評！

西甲﹕
上兩屆西甲冠軍都係由西班牙班霸皇家馬德里奪得，不過就說服力、整體表演上面，可以講一年比一年弱，如果唔係"The Classic"既老對手巴塞隆拿自己唔爭氣、華倫西亞面對巨大財赤影響實力、維拉利爾、西維爾同馬體會有前無後、後勁不繼、唔成氣候之下，皇馬想捧盃真係唔係易事。

今年巴塞隆拿痛定思痛，放走神憎鬼厭既朗拿甸奴、漸見老態既迪高、巴列提等等，仲希最重要既係請走列卡特，扶正 B隊教練、前中場大佬哥迪奧拿做 A隊教練，隨即令巴塞隆拿係今年重振雄風，打出賞心悅目既進攻足球之餘，仲打出近年少有既戰術紀律，同穩定既整體演出。暫時係聯賽得98球失28球，有咁既戰績真係無得頂！而家巴塞隆拿以86分高據榜首，只要攞多1分就可以提早封王！尋晚巴塞以4:1擊敗畢爾包，率先攞到今年第一個冠軍---西班牙國王盃！佢地又會唔會成為三冠王呢？

相反皇馬又再係季前放風要買邊個買邊個，一時卡卡一時又C‧朗，最後都買左個唔錯既荷蘭中場雲達華特，叫做完成教練蘇斯達既皇馬荷蘭化大計。照道理以上年既人腳，其實都唔會打得好差，不過皇馬又再一次自亂陣腳！先係高層人士大鬥爭，主席卡達朗搞三搞四之下，造成教練同領導層之間既決裂，咁搞法又點會搞得好？皇馬另一毛病就係球員自大到死，又分門分派之下，球員之間咁唔齊心，唉…無眼睇。好…炒左蘇斯達換左拉莫斯，有一段時間都仲叫俾到壓力巴塞，不過國家打比戰主場輸個2:6，之後又輸俾華倫西亞3:0，相信下一季皇馬由領導層、教練至球員，一定黎一次大清洗！不過值得一提既，係皇馬雖然追唔到巴塞，但係佢地都以78分排第二，比第三位既西維爾15分！即係話巴塞同華倫既距離爭成23分！幾年前西甲球隊之間既距離從來未試過咁遠！有機會再分析一下！

射手榜方面，巴塞前鋒伊度奧以28球暫時領先，馬德里體育會既烏拉圭前鋒科蘭以27球緊隨其後，華倫西亞既西班牙前鋒韋拿入25球，仍然有機會爭神射手。下年韋拿好大機會離隊，如果俾佢臨走前攞番個尾彩，都算係安慰獎。而伊度奧同科蘭呢對歡喜冤家，又再一次為左神射手爭餐死，都可以話係西甲近年既其中一個特別節目。

法甲﹕
大家可能無咁熟既聯賽，不過一講法甲，大家好自然就會諗起馬賽、巴黎聖日耳門呢對死對頭，當然更加唔少得七連冠既里昂喇！上年里昂要到最後兩輪先可以確保冠軍位置，表示其他球隊向里昂提出警告。老闆奧拉斯知道有危機，所以今年里昂先換左個教練由前里爾教練佩爾接替佩蘭，再大手入貨先後買入里爾既中場大將馬干、尼斯既巴西球員艾達臣，後防又收購國腳中堅保桑、尼斯既正選法國門將洛里斯，希望用佢一貫既做法，係法甲網羅精英，以為可以做出史前無例既7連軍。不過佢地中場方面，P‧祖連奴年齡偏大，除左佢妙到毫顛既罰球同臭脾氣無變之外，體能、速度身體既對抗性都差晒，加杜拉蘭、卡斯唐同出走里昂既前輩完全唔同級數，基本上里昂既本質已經變左，佢地唔再係無堅不摧既不敗之師。

而對手馬賽前年出售列貝利、今件出售拿斯尼，都賺左唔少錢，而且都用得其所，今年人腳漸穩之下，又有名帥吉列斯相助，所以馬賽今年打起左後衛泰禾、前鋒尼安同森馬沙；波爾多有AC米蘭借將哥古夫指揮中場，阿根廷前鋒卡雲拿基攻堅，加上整體防守嚴密體力化既踢法，係法甲非常實用。所以排名就變成咁﹕馬賽同波爾多都有71分，馬賽得失球較佳坐第一、里昂64分排第三、巴黎聖日耳門63分排第四……咦，里昂再差落去，分分鐘歐協席位都保唔住！

神射手方面圖盧茲基格納以21球領先，巴黎聖日耳門賀拉奧17球排第二，賓斯馬14球排第三。估唔到射手榜冷味咁濃，由兩個名不經轉既年輕前鋒佔據頭兩名，而賓斯馬同里昂一樣唔爭氣！大家要留意既係23歲既基格納身材高大，法國國家隊教練杜明尼治對佢好有興趣，用佢代查斯古特咁話；而賀拉奧就係3月趁安歷卡受傷，得到機會入選國家隊。無左神射手呢個榮譽事少，影響賓斯馬既國家隊前途……我係佢下年都係搵間大會轉一轉！

圖盧茲可能都估唔到基格納今季咁勁，下年都唔知留唔留得住佢……


小道消息﹕

1.巴西中場迪亞高已經簽左意願書，下年會由德甲既雲達不來梅轉投意甲勁旅祖雲達斯。同時祖雲達斯有興趣羅致基格納或者賀拉奧其中一人，代替表現日差既查斯古特。

2.馬賽方面，吉列斯下季肯定唔教馬賽，不過走左仲好，因為走馬上任既係德高望重既前國家隊隊長狄甘斯！

(部份資料來自新浪網)

下次再講意甲、荷甲。

季尾各大聯賽小評(一)

界外球希望可以做到經常更新，而且可以做多少少球評方面既野，等大家可以一路睇波一路諗下小弟講既野，所以好歡迎大家留言，大家都可以俾意見，令個界外球真係可以係專業界外發聲，大家可以分享交流。

黎到季尾，各大聯賽都就黎"收咧"結束球季是也！今年又係無大比賽既齋年，所以季後各大球星都應該可以渡下假充下電。當然，前提就梗係踢完今季、交足功課先有得放大假喇！不如就同大家睇睇歐洲幾大聯賽既戰況先﹕

英超﹕
紅魔鬼曼聯可以話愈戰愈勇，克服季初既不穩狀態之後，各個主力歸隊上力，暫時以83分加少賽一場領先利物浦3分；小弟執筆之時尚未開波，假設榜首曼聯作客贏波得3分，就會領先利物浦6分；就算和波得1分，仍然領先利物浦4分，捧盃既機會仍然好大好大！剩番落黎既兩場，對手分別係上星期歐聯主場都輸1:3俾曼聯既阿仙奴，同埋愈打愈無既候城。老實講，阿仙奴歐聯四強出局、上星期又輸俾車路士1:4，再對曼聯真係睇唔到佢地仲有力打落去；候城呢……，講利物浦好過，佢地目標應該唔係以包尾過關就可以。利物浦要追曼聯，除左要作客贏士氣如虹既西布朗，主場再殺埋熱刺之外，仲要寄望曼聯"肚痾"3分全失、仲係兩次！所以利物浦咁都可以最後捧盃，就真係神奇過當年落後兩球、反勝AC米蘭贏歐聯喇！

曼聯咁強勁，同前鋒/中場、葡萄牙球星 C‧朗拿度，季尾又再 MVP上身咁頻頻入波有好大關係。C‧朗暫時以18個入球壓住入17球既車路士法藉前鋒安歷卡、入15球既利物浦隊長謝拉特，好有機會再一次成為英超神射手！

德甲﹕
轉一轉口味，講下德國波先！上年拜仁慕尼黑重奪失落左一年既冠軍，為左重振德國巨無霸既本色，今年就請左06年世界盃德國國家隊教練奇連士文做教練，仲做左一連串既改革添。可惜事如願違，巨無霸無出現，反而拜仁愈打就愈差，奇哥更加因為辦事不力，捱唔到季尾，就比會長路明尼加"炒尤魚"！今年德甲唔單止唔係拜仁一隊惡晒，戰局仲比上一兩年更加混亂！榜首上面，由前拜仁"魔鬼"教練馬加夫帶領既禾夫斯堡以得失球壓住同得63分既拜仁，而哈化柏林就以62分緊隨其後，少賽一場既史特加亦都以追得好貼，仍然未放棄以58分追緊上黎！剩低兩場波之下，第一到第四位既球隊，都仲有機會攞冠軍，德甲群雄割據都係歐洲少見！不過睇住神奇球隊賀芬咸愈打愈沉，真係有少少望，一度佔據榜首位置既佢地，可能連歐洲比賽既入場券都撈唔到一張，做老闆既都幾傷心！

神射手方面，就剩番史特加既前鋒馬利奧‧高美斯，同禾夫斯堡既加菲迪所爭，兩個人同時以28球並列第一位，第三位既禾夫斯堡三箭頭之一既迪施高只有20球，老友識做既就讓下加菲迪喇，等呢個巴西前鋒做下神射手托下枝"小鋼炮"，威威！(德甲神射手既獎盃係一枝鋼造小型炮台！)

PS.最新消息﹕由拜仁慕尼黑官方正式宣佈，荷甲冠軍阿爾克馬爾既冠軍教練，亦即係前巴塞隆拿、荷蘭國家隊教練雲戈爾，簽訂一份為期兩年既合同，由09年7月1日起正式出任教練一職！
(引用﹕bbc.uk、新浪網消息)


下次再講西甲同法甲！

紐卡素3:1打敗米杜士堡‧護級形勢現曙光

紐卡素3:1打敗米杜士堡‧護級形勢現曙光

經過93分鐘的激戰，係形勢不利之下，紐卡素主場以3:1擊敗同區宿敵米杜士堡，取得寶貴既3分，同時將米杜士堡推落降班既深淵！

紐記同米堡真係難兄難弟，同係東北的球隊、都曾經係英超既第二梯隊既中型班，淪落到你死我亡既降班危機之中，一句抵死都唔足以說明一切。好喇，紐記無左基雲之後，龍門成為一個罩門，3分鐘，係夏柏失雲甩漏、後衛又發夢之下，米堡既土耳其前鋒端基力壓之下，紐記後衛比耶竟然擺烏龍射入自己龍門，米堡領先既一球1:0。好在6分鐘之後紐記憑中堅史提芬泰萊接應角球住扳平1:1。

下半場紐記仍然無攻擊，下下去到絰度卡之後就斷纜，反而米堡有少少控制住個節奏黎踢。好喇，舒利亞作出調動，將無甚表現既奧雲換走，由同佢傳不和既馬田斯入替。老實兩個狀態都麻麻，都係要靠人餵波既前鋒，都係博馬田斯靈活同速度，睇下有無得搞。點知，中左！71分鐘馬田斯左扣右扣甩下甩下咁，俾佢搵到個位訓身射入2:1！71分鐘喇，米堡都好難搞，焗攻之下比另一個後備入替既前鋒，盧雲克蘭斯再插一刀，86分鐘門前窩利抽射入網，紐記領先到3:1完場。

賽後形勢紐卡素憑得失球差，領先同得34分既候城排17位；而米杜士堡同樣以得失球差，壓住同得31分既西布朗排19位即係尾二！照現時情況睇，西布朗要對利物浦同布力般，唔係易踢特別利物浦仲未放棄英超；米堡先對維拉後對韋斯咸，照牌面又係唔多樂觀；侯城最慘先對保頓後對曼聯，佢地既走勢又咁差，一分都難求；而紐記先對富咸後對維拉，主場富咸好少少，作客維拉都係凍凍地。照咁睇如果西布朗、米堡下場1分都無，佢地就肯定降班；而候城自己要搶分之餘，仲要紐記無分形勢被動；紐記下場攞3分而候城失分呢，咁就可以宣佈護級成功，因為點到唔會比人炒6球掛！

蘇超盟主誰屬？！

我諗除左鍾意睇波到發燒級，又或者唔理乜野波、至鍾意賭波既賭仔之外，蘇格蘭超級聯賽相信未必係大家既選擇。無他既，除左格拉斯哥流浪、同同市宿敵些路迪之外，好多人都講唔出第三枝蘇超球隊。無疑呢兩隊主宰左蘇格蘭足球多年，成立蘇格蘭超級聯賽以來，從未有其他球隊攞過冠軍。今年又係格流同些路迪之爭，就係星期六格流小勝1:0之後，反以79分2分壓倒些路迪(77分)上榜首；排係第三既赫斯有54分，差成25分、足足帶離幾十個身位！

其實排第三既赫斯都有振作過，由立陶宛人羅曼諾夫係2005年入主球會，黎左一次「十月革命」(因為10月入主球會)一度威脅到兩大班霸既地位，特別係格流搞到第二位都不保，更加係06年代表蘇格蘭出戰歐聯，打破兩大班霸主導既局面。不過成也蕭何敗也蕭何，羅曼諾夫用人唯親，試過係老家搵成十個球員番黎打，搞到當時既國腳隊長派斯利（Steven Pressley）代表球員抗議呢個做法，點知被老闆即時解僱引起風波，最後仲加盟些路迪添！又因為咁佢地內亂不止，點都追唔番上黎。

最後講番"Old Firm"(蘇格蘭人形容桐流對些路迪既叫法)爭冠軍先，兩隊都要對登地聯同喜伯年呢兩枝老牌球會，登地聯其實同赫斯只差一分排第四，來屆有機會踢歐協搵下外快，不過距離第五位既鴨巴甸4分之下，對住Old Firm都一定唔會手軟！提多一提，上屆些路迪三連霸都係靠格流最後一場輸左俾鴨巴甸全失3分，偏偏格流最後三場中既第二場要對佢地。領隊史密夫都好小心，係贏左些路迪之後都唔敢話放心！蘇超盟主誰屬，都係要睇多三場。

PS.派斯利都係麻煩友，不滿續約條件離開些路迪，打過下丹麥聯賽，而家踢包尾既福爾柯克……