英超榜尾大混戰！

英超榜尾大混戰！星期六晚出事喇！相信部分有睇西布朗對韋根既朋友，一定跌晒眼鏡！

其實西布朗一直都排榜尾，大家都以為佢一定降梗班，點知西布朗趁住前面幾隊唔爭氣，近三場除左輸俾熱刺1:0之外，3:0贏新特蘭，追下追下同前面東北雙「殘」紐卡素、米杜士堡3分。相反穩坐釣魚船，諗緊來屆組班大計既韋根，近五場波輕取侯城1:0之外，食左愛華頓四蛋4:0、俾阿仙奴炒1:4、布力般2:0、保頓又和0:0。所以細心既球迷就會知道，西布朗戰意一定比韋根強。另外西布朗原來主場一d都唔差，7勝3和8負，排第六既愛華頓都係7勝6和5負咋！相反韋根就係地頭虫，4勝4和10負，咁既作客成績真係死得人多。果然中左！

呢場波之後，英超榜尾大亂，最尾三隊同得31分，紐卡素以得失球兼少賽一場排係18位，之後就係星期一同紐記大戰既米杜士堡，西布朗多打一場仍然包尾。16位既新特蘭有36分、17位既侯城有34分，如無意外下一場波新特蘭攞一分兼唔比人大炒既話就可以上岸。侯城既形勢就好被動，因為星期一紐記對米堡呢場波，有一隊可以全取3分呢，都一定可以憑得失球壓過侯城上17位；如果和氣收場，侯城都只係領先2分，最後一場仲要對曼聯，多打一場領先3分既優勢根本唔係優勢。所以最後邊三隊要下屆英冠再見呢，最後兩場波仍然有睇頭！當然，星期一果場東北打比大戰，雖然唔會有秀麗腳法、精湛技術睇得到，但係打到"博甩臂"、"打崩牙、帶血吞"既場面，仲要關乎降班誰屬既比賽，個人推介必睇！